तीन गझला : रवि प्रकाश चापके

१.

तिच्या आसवांनी  भिजे पावसाळा.
उशाशी तिच्या का निजे पावसाळा?

उन्हाच्या झळा  प्राण  घेवो भलेही
नको आठवांचा, डिजे  पावसाळा !

तिचे मन कुकर, बघ हसे देत शिट्टी..
म्हणे दोन नयनी, शिजे  पावसाळा

'ढगा थांब ना रे.. तुला  सूट  शिवतो'
म्हणे  एक अंकुर, खिजे  पावसाळा

दिसेना  कुठे  हाय   पाऊस-वेडी ?
स्वतः गारठे अन्  थिजे  पावसाळा.

२.

झुरावे स्वर्ग  सातीही असे  सुंदर असावे घर
श्रमाने दर्वळावे छान,मातीने   मळावे  घर

फुटावी लाज थकव्याला,जरा काबाड कष्टांनी..
फुले यावीत  घामाला , श्रमाने  मोहरावे  घर

निघालो दूरदेशी  तर , प्रतीक्षेचे  झुलो  तोरण.
रडावे  उंबऱ्याने अन् , प्रवासाला  डसावे  घर

चुलीच्या फुंकणीचीही , कधीतर बासरी व्हावी?
फुटावा  कंठ  भिंतींना, स्वरांनी गुणगुणावे घर

विजांनो , वाजवा डी.जे...धरेवरती  पडो गारा
अशा वेळी मुलांसाठी जरा अपुले गळावे घर

शिजो पोटात कुक्करच्या भले छद्मी महाभारत.
कणा  कणखर असो राया, रडूनीही हसावे  घर!

नका काढू विमा नुस्ता कुणीही  रक्त -नात्यांचा.
स्वतःचे  श्वास  जपतो ना, तुम्ही  तैसे जपावे घर!

३.

तिला आरशाची नजर लागली तर?
प्रतीबिंब  माझेच  सांडेल  घरभर !

जगू  देत  नाही,मरू देत नाही...
हळद माखलेली,तिची याद उपवर!

तिच्या ' मीपणावर ' म्हणे  आरसाही-
'किती छान दिसतेस ,नुसतीच वरवर !'

विचारेल  शंका,कुठाहेत  फोटो ?
खुलेआम काळीज फाडेल दिलबर

फिरे गरगरा भोवरा  मी  युगाचा
मला नित्य घरघर,मुबारक तिला घर !

.................................
रविप्रकाश(चापके)
88 5585 5585